"Унааны талкаладың деп кайын журтум сотко берген" деген келин акыйкат чечим күтөрүн билдирди

Бүгүн, 16-декабрда "SUPER-MEDIA" маалымат борборунда "жолдошум кызуу абалында мага кол көтөрүп, башымды жарды" деген аял Асел Темкеева маалымат жыйын берди.

Ал өз сөзүн "мен бул жерге келгенимдеги көйгөйүм төмөнкүчө" деп баштады. Айтымында, Асел Темкеева менен кайын журту 2 жылдан бери соттошуп жатышат. Темкеева жолдошум экөөбүз алган унааны мени талкалап салды дешип сотко беришкен деп билдирди.

"Жолдошум экөөбүз бирге жашаганыбызга 7 жыл болду. Бул жыл аралыгында эки балалуу болдук. Экөөбүз башында жакшы эле жашап, акыркы жылдары көп урушуп баштадык. Ичип алып колун көп көтөрө турган болду. Ошол күндөрдүн биринде 2018-жылы 13-майда мен кадимкидей эле жумуштан баламды алып үйгө келсем, кызуу экен.

Экөөбүздүн ортобузда түшүнбөстүк болуп, мени сабап, башымды жарды. Алардын баарын уулубуз көрүп, ыйлап бакырып, балам болушуп кирди. Баламды көрүп ал дагы токтоп калгандай болду. Башымды жарып, унаасын айдап алып кетип калды. Ал учурда кайын энем үйдө болчу. Ошол эле күнү байкем келип мени ооруканага алып кетти. Сыртка чыгып унааны карасам, унаанын айнеги сынык экен. Жолдо бара жатып сындырганбы, эмне болгонун билбейм", - дейт ал.

Ал эртең бул боюнча соттук отурум өтө турганын белгилеп, сот бардык жагдайларды карап чыгып, туура чечим чыгарса деген тилегин айтты.

Ал эми экинчи тараптын жообун билүү үчүн Асел Темкееванын жолдошу Алмаз Тентимишевке байланышканыбызда, ал төмөнкүлөргө токтолду.

"Ага көп ишенбегиле, анча мынча сөздөрдү оюнан чыгарып жиберет. Ал биринчи өзү кол көтөрөт, качан гана ал кол көтөргөндө гана мен кол көтөрөм", - дейт Алмаз Тентимишев.