Кыргыз өлкөсүндө уран казууга тыюу салынды

Өлкө башчы Сооронбай Жээнбеков уран, торий кендери чыккан жерлерди издөө, чалгындоо жана иштетүү максатында жер казынасын геологиялык изилдөө иштерине тыюу салуу жөнүндөгү мыйзамына кол койду. Бул тууралуу президенттик аппараттын маалыматтык саясат бөлүмүнөн билдиришти.

Ага ылайык, мыйзам Жогорку Кеңеш тарабынан 2019-жылдын 31-октябрында кабыл алынган.

“Мыйзамдын максаты калктын ден соолугун, жерлерди, суу объекттерин, өсүмдүктөр жана жаныбарлар дүйнөсүн коргоого, жарандардын жашоо, эмгектенүү жана эс алуу үчүн жагымдуу айлана-чөйрөгө болгон укуктарын, ошондой эле Кыргыз Республикасында радиациялык жана экологиялык коопсуздукту камсыз кылууга багытталган”, - деп айтылат маалыматта.

Мыйзамга ылайык, Кыргыз Республикасынын аймагында төмөнкүлөргө тыюу салынат:

1) уран, торий кендери чыккан жерлерди издөө жана чалгындоо максатында жер казынасына геологиялык изилдөө менен байланышкан иштерди жүзөгө ашырууга;

2) уран, торий кендери чыккан жерлерди иштетүүгө (уранды, торийди казып алууга);

3) радиоактивдүү калдык сактоочу жайларды, кен калдыктарын иштетүүгө жана андан ары иштетүү жана кармап-күтүү максатында аларды жеке жактарга берүүгө.

Кыргыз Республикасынын аймагына уран камтылган жана торий камтылган чийки заттарды жана калдыктарды алып келүүгө жол берилбейт.

Мыйзам расмий жарыяланган күндөн тартып он беш күн өткөндөн кийин күчүнө кирет.

Маалым болгондой, буга чейин Кызыл-Омпол тоосудагы уран-торианит чачылмаларын иштетүүгө берилген лицензиянын айынан коомчулукта нааразычылыктар пайда болгон.