2 саат министр болуп "иштеген", ден соолугунун мүмкүнчүлүгү чектелген өспүрүм Тилегендин тилеги аткарылды

Мындан бир ай мурун Тилеген Рахатбеков аттуу ден соолугунун мүмкүнчүлүгү чектелген өспүрүм 2 саат символикалуу түрдө Эмгек жана социалдык өнүгүү министрлигин башкарган. Бул учурда ал өзү окуган мектепте китептер, шахматтык доскалар жетишсиз экенин айткан.

Тилегендин тилеги орундалганын аталган министрликтен маалымдашты.

“Мындан 1 ай мурда Тилеген Рахатбеков деген өспүрүм биздин Эмгек жана социалдык өнүгүү министрлигин символикалуу түрдө 2 сааттай башкарып, өзү окуган Дүлөй балдар үчүн атайын орто мектеп-интернатка окуу китептери жетишсиз экенин, шахматтык доскалар зарыл экендигин айткан эле. Биз аны министрдин тапшырмасы катары кабыл алып, 1 ай ичинде аткарганга жетиштик. Тилегендин министрлик кызматты аркалагандыгы, анын тапшырмалары тууралуу жалпыга маалымдоо каражаттары аркылуу кабардар болушкан “Human Appeal International” кайрымдуулук фондунун жетекчиси Али Айоуб, жеке ишкер, уста Жумабек Мамажанов кайрымдуулук үчүн кол сунуп, Тилегендин тилегин орундатып келдик. Ар дайым турмуш шарты оор жарандарга колдоо көрсөтүп, кайрымдуулук көрсөтүү ниетинде жүргөн жогорудагы эки инсанга ыраазычылык билдирем. Ден соолугунун мүмкүнчүлүгү чектелген балдар үчүн атайын орто мектеп-интернатка сапарыбыз мектептин 85 жылдык мааракесине да дал келип, алып барган 210 миң сомдук китептин сертификаты, шахмат, шашки жана башка спорттук инвентарлар мектепке майрамдык белек болуп калды”, - дейт министр Улукбек Кочкоров.

Маалыматта белгиленгендей, Тилеген шахмат боюнча эл аралык мелдешке кетип, тилекке каршы иш-чарага катыша албай калган.

Тилеген Рахатбеков Балдардын укуктары жөнүндө Конвенциянын 30 жылдыгына жана Кыргыз өлкөсүндө Конвенциянын ратификациялангандыгынын 25 жылдыгына карата өткөн акцияда 2 саатка министр болуп иштеген.