70 жыл чогуу жашаган түгөйлөр бир күндө каза болушту

АКШнын Мичиган штатынын тургундары Лес жана Фред Остиндин баш кошконуна 70 жыл болгон. Алар бир күндө 20 мүнөт айырмачылык менен бул дүйнө менен кош айтышкан. Бул тууралуу чет элдик басылмалар жазып чыгышты.

Лес менен Фред окуучу кезинде таанышып, мектепти аяктаган соң, 1949-жылы баш кошушкан. Түгөйлөр деңиз жээгине коюлган мунараларга (маяк) барып эс алганды жактырышчу. Өмүрү өткөнчө алар Мичигандагы бардык мунараларды кыдырып чыгышканы айтылат. Ноябрь айында алар баш кошконунун 70 жылдык юбилейин өткөрүшкөн. 6-декабрда экөөнү тең хосписке алып келишип, жанаша жайгашкан керебетке жаткырышкан. 7-декабрь күнү түгөйлөр удаа, 20 мүнөт убакыт айырмачылык менен 90 жашында каза болушкан. Алардын артында 2 баласы, 4 небереси жана 8 чөбөрөсү калды. Небереси Леинин айтымында, чоң атасы менен чоң энеси өмүрүндө бир гана жолу Лес жубайына айтпай, Корей согушунда аскерге жазылып алгандыгы үчүн урушушкан.