31-декабрда чет жактан ташылып келген автоунааларга берилүүчү жеңилдетилген салыктын мөөнөтү аяктайт

2019-жылдын 31-декабрында жеке пайдалануу үчүн жеке жактар тарабынан үчүнчү өлкөлөрдөн ташылып келген автоунааларга карата жеңилдетилген бажы алымынын жана салыктын мөөнөтү аяктайт. Бул тууралуу Мамлекеттик бажы кызматынан билдиришти.

"Автоунаа ташыган жактарга ыңгайлуу шарт түзүү жана кезекти болтурбоо үчүн, Мамлекеттик бажы кызматынын “Түндүк-Чыгыш” бажысынын жана “Түндүк Темир-жол” бажысынын башчыларынын буйруктарына ылайык, 2019-жылдын 20-декабрынан 31-декабрына чейин автотранспорт каражаттарын тариздөө жайларынын иш убактылары дем алышсыз жана саат 24:00гө чейин узартылды", - деп айтылат маалыматта.

Бажылык тариздөөнү төмөнкү бажы органдарында жүргүзсө болот:

“Түндүк” Темир жол бажысы, “Автомобилдик” БТЖ - дареги: Бишкек шаары, Чолпон-Ата көчөсү 2а.

Түндүк-Чыгыш бажысы, “Автомобилдик” БТЖ - дареги: Военно-Антоновка айылы, Степная көчөсү, “РИОМ Авто” унаа базары.