Сот Текебаевди кийинки жылдын 29-февралына чейин үй камагында калтыруу чечимин чыгарды

Бүгүн, 23-декабрда Бишкектеги Биринчи Май райондук сотунда "Ата Мекен" партиясынын лидери Өмүрбек Текебаев менен мурдагы элчи Дүйшөнкул Чотоновго козголгон кылмыш ишти кайра кароо боюнча соттук отурум уланууда. Отурумда судья Айнура Сатарова соттук териштирүүнүн мөөнөтү аяктаганына байланыштуу аны узартуу керек экендигин билдирген.

Кеңешме бөлмөсүнөн келгенден кийин судья Текебаев менен Чотоновдун баш коргоо чарасы өзгөртүүсүз калгандыгы жөнүндөгү чечимди окуду. Ошону менен Текебаев дагы, Чотонов да 2020-жылдын 29-февралына чейин үй камагында калмай болду. Бул аралыкта аларга өлкө аймагынан чыгууга, жашаган даректери боюнча кат алып, кат жөнөтүүгө тыюу салынды. Соттун чечимине нааразы болгондор " Билими жок соттор отурат", "Силер эч качан оңолбойсуңар" деп бир нече катышуучу сот залынан чыгып кетишти. Соттук иш боюнча кийинки отурум 9-январга белгиленди.

Окуянын чоо-жайы:

21-августта Жогорку Сот Текебаев менен Чотоновго карата чыккан соттук чечимдер жокко чыгарылып, жазык иш жаңы соттук териштирүү үчүн Биринчи Май райондук сотуна жиберилсин деген чечим чыгарган. 29-августта Биринчи Май райондук соту Текебаев менен Чотоновду үй камагына чыгаруу чечимин чыгарган.