Мексиканын Аргентинадагы элчиси 10 долларлык китеп уурдап, кызматынан алынды

Мексиканын Аргентинадагы ыйгарым укуктуу элчиси Рикардо Валеро ден соолугу начарлап кеткендигине байланыштуу кызматынан кетти. Бул тууралуу Мексиканын тышкы иштер министри Марсело Эбрард өзүнүн Твиттердеги баракчасына жарыялаганын чет элдик басылмалар жазып чыгышты.

Маалыматка ылайык, 76 жаштагы элчи декабрь айынын башында китеп саткан дүкөндөрдүн биринен Жакомо Казанованын автобиографиялык китебин уурдап алгандыгы видеокөзөмөлгө түшүп калган. Ал китептин баасы 10 доллар болгондугу белгилүү болгон. Бул окуя жалпыга маалымдоо каражаттарына белгилүү болгондон кийин элчини кызматынан алуу чечими чыккан.

2012-жылы Рикардо Валеро баш мээсинен операция болгон. Дарыгерлердин айтымында, бул окуядан кийин анын абалы кескин түрдө начарлап кеткен. Учурда дарыгерлердин көзөмөлүндө. Белгилүү болгондой, Валеро бул кызматта 2019-жылдын март айынан бери иштеп келген.