Убактылуу берилген айдоочулук күбөлүктүн мөөнөтү узартылды

2019-жылдын 10-июнунан 31-декабрга чейин жарактуу мөөнөтү менен берилген айдоочулук күбөлүктөрдүн мөөнөтү 2020-жылдын 15-февралына чейин узартылды. Бул тууралуу Мамлекеттик каттоо кызматынын басма сөз кызматынан билдиришти.

"Өкмөттүн 2019-жылдын 25-декабрындагы № 499-р буйругунун негизинде, 2019-жылдын 10-июнунан тартып 2019-жылдын 31-декабрына чейин жарактуу мөөнөтү менен берилген айдоочулук күбөлүктөрдүн (шарттуу түрдө «убактылуу» деп аталган) мөөнөтү 2020-жылдын 15-февралына чейин узартылды. Айдоочулук күбөлүктү алуу үчүн жарандардан арыз Унаа мамлекеттик мекемесинин бардык аймактык бөлүмдөрүндө кабыл алынат. Бишкек шаары боюнча айдоочулук күбөлүктөрдү алмаштыруу боюнча арыздар Бишкек шаары Ч.Валиханов 2 дарегинде («Аю Гранд» гипермаркетинин аймагында), ал эми айдоочулук күбөлүктөрдү берүү М.Ауэзов 1/5 дарегинде жайгашкан №4 калкты тейлөө борборунда жүргүзүлөт", - деп жазылат билдирүүдө.