Футбол федерациясынын вице-президенти Дастан Конокбаев: "Футбол борборун куруу маселеси чечилбесе, улуттук курама команда Бишкекте оюндарга чыгуудан баш тартат"

25-декабрда Бишкек шаардык кеңешинде Футбол борборун куруу үчүн жер тилкесин бөлүп берүү маселеси каралып, бирок аягына чыкпай калган. Бул маселени кароо бүгүн, 26-декабрда саат 11:00дө улантылмай болгон. Бирок жыйын дагы деле баштала элек.

Кыргыз футбол федерациясынын вице-президенти Дастан Конокбаев эгерде Футбол борборун куруу маселеси чечилбесе, анда улуттук курама команда Бишкекте оюндарга чыгуудан баш тарта турганын билдирди.

- Жер маселеси эмнеге чечилбей жатат? Эмне кармап жатат?

- Депутаттар өздөрү мэрден сурап жатышат, эмнеге бул маселе кармалып жаткандыгын. Мэр өз сөзүндө бул долбоорду колдой тургандыгын айткан. Бирок учурда сөздү эмес, биз чечимди күтүп жатабыз.

- Футбол борбору курулбай калса эмнени жоготкон болобуз?

- Футболчуларыбызды сапаттуу даярдандырууну жоготобуз. Ар кыл жаштагы 20дай Улуттук курама командалар бар. Башка өлкөлөр менен атаандаштыкты жарата албай калабыз. Учурда команданын базасы жок. Башка өлкөлөргө барып, көп каражат короткончо өзүбүздүн базада даярдык көрмөкпүз да.

Буга чейин Футбол федерациясынын өкүлү Нурдин Букуев SUPER.KG порталына берген маегинде "Футбол борборун курууга 31-декабрга чейин жер маселеси чечилбесе, ФИФА грантты башка өлкөгө берип коёт" деп айткан. 5 миңдей жаш футболчулар тарбиялана турган футбол борборун курууга Бишкектин түштүк тарабынан 8 гектар суралып жатат. Анда 5 миң кишиге ылайыктуу стадион, 4 кичи стадион, медициналык борбор жана башкалар чогуу курулат.