Футбол борборун куруу үчүн жер тилкесин бөлүп берүү маселеси дагы чечилген жок. Кыргыз өлкөсү гранттан куржалак калышы мүмкүн

Бүгүн, 27-декабрда Бишкек мэриясында шаардык кеңештин депутаттары Футбол борборун куруу үчүн жер тилке бөлүп берүү маселесин карашмак. Бирок бүгүн да бул маселе боюнча чечим чыкпай, кийинки жыйын 14-январга жылды.

Ошентип бул маселе 3 күн катары менен каралып, бирок ошого карабастан, чечим чыкпаган бойдон калды. Ал эми жер тилке бөлүп берүү маселеси жалпы жонунан жарым жылдан бери каралып, создуктурулуп келе жаткан.

Ошондой эле бүгүн Бишкек шаардык кеңешинин "Республика-Ата-Журт" фракциясы мэр Азиз Суракматовго ишенбөөчүлүк көрсөтөрү маалым болду. Шаардык кеңештин айрым депутаттарынын айтымында, чечим бир гана мэрдин колунда калып кармалып жатат.

Буга чейин Футбол федерациясынын өкүлү Нурдин Букуев SUPER.KG порталына берген маегинде "Футбол борборун курууга 31-декабрга чейин жер маселеси чечилбесе, ФИФА грантты башка өлкөгө берип коёт" деп айткан. 5 миңдей жаш футболчулар тарбиялана турган футбол борборун курууга Бишкектин түштүк тарабынан 8 гектар суралып жатат. Анда 5 миң кишиге ылайыктуу стадион, 4 кичи стадион, медициналык борбор жана башкалар чогуу курулат.

14-январга жылдырылганына караганда, ал эми акыркы мөөнөт 31-декабрга чейин белгиленгендиктен, Кыргыз өлкөсү грантсыз калышы ыктымал.