"Баткен" аэропортунун жетекчиси президентке кайрылуу жасады

Кечээ, 28-декабрда "Ош" аэропортунун жетекчилиги тарабынан кысымга кабылып, жумуштан кетүүгө мажбур болгонун "Баткен" аэропортунун жетекчиси Нургазы Жаныбеков билдирип, президент Сооронбай Жээнбековго видео кайрылуу жасаган.

Ал өзүнө бир топ убакыттан бери Баткен облусунун прокурору Абдибакыт Халмурзаев тарабынан кысым, коркутуу болуп жатканын билдирген. Мындан улам ал 31-декабрь күнү өз арызы менен жумуштан кетүүгө мажбур экендигин кошумчалаган.

"Бүгүнкү күндө "Баткен" аэропортунда сабатсыз кызматкерлер дагы иштейт. Бул тууралуу мен "Ош" аэропортунун кадрлар бөлүмүнө бир нече жолу кат жүзүндө кайрылгам. Бирок Оштун жетекчилиги бул нерсеге көңүл бурган эмес. Билимдүүлөр калып кетип, билимсиздер башкарып, коррупциянын бети ачылбай жатат", - деп билдирген ал.

Ал Кыргыз өлкөсүндө авиация тармагында коррупция күч алганын, "Баткен" аэропорту “эл аралык” макамынын талаптарына жооп бербесин өлкө башчысына кайрылуусунда айткан.

Нургазы Жаныбеков 2018-жылы 4-июлда "Баткен" эл аралык аэропортунун жетекчиси болуп дайындалган.

SUPER.KG порталы экинчи тараптын да оюн угуп, жарыялоого даяр.