Футбол федерациясы күйөрмандарына расмий кайрылуу таратты

Бүгүн, 29-декабрда Кыргыз Республикасынын Футбол федерациясы футбол сүйүүчүлөрү жана күйөрмандарына расмий кайрылуу таратты.

"Футбол борборун куруу үчүн убактылуу пайдалануудагы жер тилкесин бөлүп берүү маселесин түшүнгүсү келбеген же "түшүнбөй жаткан" адамдар тарабынан жайылып жаткан бардык ушак-айыңдарга карабай, биз бейтарап маалыматты көрсөтүүнүн жардамы менен аларды жоюшубуз керек.

Мыйзамсыз жана чагымчыл аракеттердин (митинг) алдын алып, спорттун өнүгүү тагдырына кайдыгер карабаган бардык адамдарды, футбол сүйүүчүлөрү жана күйөрмандарынын кабатыр болуп жатканын түшүнүү менен Кыргыз Республикасынын Футбол федерациясы бардыгыңыздарды федерациянын жетекчилиги менен жолугушууга чакырат. Жолугушуу эртең, 30-декабрь күнү саат 10до Футбол үйүндө болуп өтөт. Ал Бишкек шаарынын Медеров көчөсүнүн (7-апрель (мурдагы Алма-Ата көчөсү) көчөсү менен кесилишинде) 1Б дарегинде жайгашкан.

Ар бириңиздердин колдооңуз менен биз өзүбүздү чоң күч сезип, бир гана укуктук талаада Кыргыз мамлекетинин футболунун өнүгүшү үчүн маселенин чечилишине түрткү берүүгө мүмкүн.

Түзүлгөн кырдаалга байланыштуу Футбол федерациясынын жетекчилиги грант берүүчүлөр жана башка жергиликтүү өзүн-өзү башкаруу органдары менен бул долбоордун ийгиликтүү ишке ашыруу максатында сүйлөшүүлөрдү баштады", - деп жазылат кайрылууда.