Орусиядан келе жаткан Кыргыз жарандарынын унаасы кырсыкка кабылып, экөө каза болгону айтылууда

Бүгүн, 2-январь күнү социалдык тармактарга "Казакстанда кыргыздар авария болушуптур" деген аталыш менен видео жарыяланды. Анда кырсыктан соң унаага кысылып чыга албай калган, сыртта канжалап жаткан адамдарды көрүүгө болот. Бул окуя боюнча жабыркагандардын кошунасымын деген мырза менен байланыштык. Ал SUPER.KG порталына төмөнкүлөрдү айтып берди.

"Окуя 31-декабрь күнү болгон. Орусиядан келаткан мекендештерибиздин жүк ташуучу гигант унаасы менен казакстандык өзбектердин пияз жүктөп бараткан фурасы кагылышып, жыйынтыгында эки Кыргыз жараны каза болгон. Угушумча, фурадагы бир адам да көз жумган. Кыргыз жигиттеринин бири Кара-Суу районунун тургуну, экинчиси биздин кошунабыз, Алай районунан болот. Кошунабыз 39 жашта эле, бүгүн жерге берилди. Артында бир уул, бир кызы калды. Маркумдун атасы да оорукчан эле, аябай жаман окуя болду, айыл ызы-чуу түшүп жатып калдык", - деп билдирди кошунасы.

Кырсык тууралуу маалыматты расмий мекемелер тастыктай элек. Маалымат толукталат.