Бүт дүйнө бир өлкөнүн ызасына көз салып отурат... Ирандын экинчи таасирдүү адамы Дональд Трамптын буйругу менен өлтүрүлдү

Бүгүн, 3-январда Иранда экинчи таасирдүү адам болгон генерал Касем Сулеймани АКШнын президенти Дональд Трамптын буйругу менен өлтүрүлдү. Бул тууралуу дүйнөлүк ЖМКлар жазып чыгышты.

Ирандын чет жердеги куралдуу операцияларын уюштуруусу үчүн жооптуу Сулеймани америкалык куралдуу күчтөрдүн ракеталык-бомбалык соккусунан улам каза болду. Мындайча айтканда, АКШнын Багдад шаарындагы элчилигине болгон кол салуу үчүн өлтүрүлдү.


27-декабрь күнү Ирактын Киркук шаарына жакын жайгашкан аскердик базасына 30дан ашуун ракета чыгарылып, бул чабуулда АКШнын жана Ирактын бир нече жарандары набыт болгон. Америкалык бийлик Иран колдогон "Катаиб Хезболла" тобу кол салды деп күнөөлөп чыккан. 29-декабрь күнү АКШ аталган топтун Ирак жана Сириядагы позицияларын бомбалаган. Жыйынтыгында 24 адам каза болгон. 31-декабрь күнү "Катаиб Хезболла" тобунун тарапташтары Багдад шаарындагы АКШнын элчилигине жөө жүрүш уюштуруп, дипломаттар бир күнгө ишин токтотууга аргасыз болушкан. 3-январь күнү Багдад шаарындагы аэропорттон чыгып бара жаткан бир канча унаалар абадан чабуулга тушугушкан. Анда Сулеймани жана "Катаиб Хезболла" тобунун кол башчылары болгон.


Маркум генерал өлкөсүндөгү бийликтин иерархиясында турган эң таасирдүү жана кадыр-баркы жогору адамдардын катарында эле. 2016-жылы президенттикке талапкерлердин бири катары каралган. Анын өлүмү Иранда гана эмес, бүт аймактагы абалга таасир бериши ыктымал. Батыш ЖМКлары Касем Сулейманини Ирандын мамлекет башчысынан кийинки эле экинчи адам, иш жүзүндө азыркы президентине караганда таасирдүү киши болгон деп эскеришүүдө. "Ал өмүр бою согуштарда жүрдү, аскерлер аны жакшы көрчү. Генерал токтоо, төрт тарабы төп келген жигит, стратегиялык жактан гений, жөндөмдүү тактик эле" деген америкалык генерал-лейтенант Марк Хертлинг. Америкалык ЖМКлар жазгандай, буга чейин Барак Обама да, Жорж Буш да Сулейманинин көзүн тазалоого батынышкан эмес анткени Иран менен согуш чыгып кетет деп чочулашкан.

Ирандын башкы лидери Али Хаменеи үч күндүк аза күтүүдөн кийин анын өлкөсү АКШга сокку урарын, Сулейманинин өлүмүнө тиешеси барлардын баарынан өч аларын жарыялады. Бул аралыкта АКШнын Мамлекеттик департаменти өз жарандарына Ирактын аймагынан тез арада чыгып кетүүсүн айтты.