Атың чыкпаса өрттүн жанында сүрөткө түш! Күйүп жаткан үйдүн жанында сүрөткө түшкөн өрт өчүрүүчүлөр

АКШнын Мичиган штатынын Детройт шаарынын өрт өчүрүүчүлөрү өрттөнүп жаткан үйдү өчүрүүнүн ордуна тобу менен өрттүн фонунда сүрөткө түшүп, сынга кабылышкан. Бул тууралуу чет элдик басылмалар жазып чыгышты.

Өрт өчүрүүчүлөрдүн сүрөтү аталган бөлүмдүн Фейсбуктагы баракчасына "Бригада Жаңы жылдык селфи кылуу үчүн жакшы маал тапты" деген билдирүү менен жарыяланган. Социалдык тармактын колдонуучулары сүрөттү катуу сынга алышкандыктан, сүрөт көп өтпөй өчүрүлгөн. Шаардык администрациянын өкүлүнүн билдиришинче, өрт болгон үйдө эч ким жашаган эмес. Кызматкерлердин бири пенсияга чыгып жаткандыктан алар тобу менен эстеликке сүрөткө түшүшкөн.

Детройт шаарынын өрт өчүрүү кызматынын комиссары Эрик Жон мындай жорукту орунсуз жана профессионалдуулукка жатпайт деп билдирип, окуя териштирилерин айткан.