500 миллиондон ашуун жандык, анын ичинен 8 миңдей коала... Австралиядагы апаат баарын жалмап бара жатат

Австралияда акыркы айлар ичинде өрт 24 адамдын өмүрүн алды, андан тышкары 30дай кишинин дайыны белгисиз. 5 миллион гектардан ашуун жер, 1 миң 400дөн ашуун турак жай, 1 миң 300дөй имарат, 500 миллиондон ашуун жандык, анын арасында 8 миңдей коаланы жалмап кетти. 10 миллиондон ашуун адам ыш аралаш абадан дем алууда. Аталган континенттин бийлиги тарыхында болуп көрбөгөн масштабдуу эвакуацияны башынан өткөрүп жатат. Тилсиз жоонун келтирген зыянынын так саны эсептелип бүтө элек. Бул тууралуу дүйнөлүк ЖМКлар жазышууда.

Өрт чыккан айрым жерлерде оттун жалыны күчтүү болгону үчүн же түтүнү коюу болгонунан улам абадан өчүрүү мүмкүн эмес болууда. Тик учактар мындай учурда жардамга келе албай жатат. Маллакута шаарында өрттөн улам үйлөрүн таштай качкан эл аргасыздан жээкке барып баш калкалаган. Кийин алардын баарын Австралиянын аскердик-деңиз флотунун кемеси коопсуз жайга алып кеткен.

Австралиянын өкмөт башчысы Скотт Моррисон тилсиз жоого каршы армиянын 3 миңдей аскери тартыларын билдирди. Коргоо министри билдиргендей, өлкөнүн тарыхында биринчи жолу аскерлер өрттү өчүрүүгө катышат.

Бул аралыкта метеорологдор да жакынкы күндөргө карата аба ырайы деле ырайым көрсөтпөй турганын билдиришти. Күн 40 градуска чейин ысыйт. Өрт ушул жылдын март же апрель айына барып толугу менен өчүрүлөт деп айтышууда.