Москвада кыргыз жигити өлтүрүлдү. "Инимдин сөөгүн мекенине алып келе албай жатабыз" дейт маркумдун эжеси

2019-жылы 31-декабрь күнү Москвада Жайыл районунун тургуну Адилет Байсабаев киши колдуу каза болгон. Маркумдун эжеси дагы деле сөөктү мекенине алып келе албай жатышканын айтат.

"31-декабрь күнү иним Москвада киши колдуу каза болгон. Дагы деле сөөгүн мекенине алып келе албай жатабыз. Ал жакта азыр дем алыш, эртең майрам экен, кандай кылышты да билбей калдык. Орусияда азыр иним бар, ошол артынан чуркап жүрөт. Орусиядагы элчилик жардам беребиз деп жатышат. Билбейм, качан ал ишке ашарын", - дейт маркумдун эжеси.

Окуя боюнча Кыргыз өлкөсүнүн Орусиядагы элчилигинин басма сөз кызматынан төмөнкүдөй маалымат беришти.

"Москвадан 31-декабрь күнү 1994-жылы туулган Кыргыз жаранынын жансыз денеси табылган. Учурда маркумдун өлүмү боюнча териштирүү, тергөө иштери жүрүүдө. Маселе элчиликтин, миграция жана ИИМдин өкүлдөрүнүн көзөмөлүндө. Туугандары менен байланыштабыз. Сөөгү жакынкы күндөрү мекенине жөнөтүлөт", - дейт басма сөз кызматынан.