Садыр Жапаров 1 айдан кийин жатак абакка которулат

Саясатчы Садыр Жапаров 5-февралда №1 түзөтүү абагынан жатак абакка которулат. Мындай маалыматты Жапаровдун жактоочулары билдиришти.

"Мыйзам боюнча Садыр Жапаров 2020-жылдын 5-февралына чейин түзөтүү абагында мөөнөтү аяктап, андан кийин жатак абакка которуу мөөнөтү келди. Аны Жазаларды аткаруу мамлекеттик кызматынан түзүлгөн комиссия карап чыгат. Эгерде ал түрмөдө отурганда тартип бузбаса, кылмыш иштин алкагында карызы жок болсо, жатак абакка чыгарат. Садыр Жапаровдун карызы жок, тартип бузган эмес. Мындан улам ал 6-февралда жатак абакка которулат", - деп билдирди жактоочу Шарабидин Токтосунов.

Окуянын чоо-жайы:

Садыр Жапаров 2013-жылдын 7-октябрында Каракол шаарында "Кумтөр" боюнча нааразычылык акциясындагы баш аламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан, өзү чет өлкөдөн кайтып келе жатканда кармалып, камакка алынган. Ал учурда Садыр Жапаровду миңдеген тарапташтары жолугуу үчүн күтүп турушкан. УКМК жолугууга жол бербей, чек ара күзөт бекетинен кармап кеткен.

2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун өкүмүн Бишкек шаардык соту жана Жогорку Сот күчүндө калтырган. Быйыл 30-апрелде Жогорку Сотто абактагы саясатчы Садыр Жапаровдун иши кайрадан каралып, соттук коллегия анын жаза мөөнөтүн бир жарым жылга кыскарткан.