Баткенде күйөөсү сабап өлтүрдү делген келиндин кошунасы: "Ооба, күйөөсү сабачу"

3-январь күнү Баткен шаарынын Базар-Башы кварталында 26 жаштагы келин менен 7 жылдан бери чогуу жашаган күйөөсүнүн ортосунда уруш чыгып, чырдын кесепетинен келин каза болгон. Маркумдун жансыз денесине кароо жүргүзүшкөндө, күйүктөн улам колу-бутунун териси шылынган жаракаты бар экени аныкталган. Бул үй-бүлөнүн аты-жөнүн атагысы келбеген кошунасы окуя боюнча буларды айтып берди.

"Маркум келин аябай жакшы адам болчу. Жөнөкөй, адамгерчиликтүү. Алыстан болсо дагы саламын берип, үйүндө эле үй жумуштары менен алек болуп жүрө берчү. Биз билгенден күйөөсү экөө Орусияга дагы барып, иштеп келишкен. Келин өзү Оштон болот экен. Анын сөөгүн туугандары ошол жакка алып кетишти деп айтышты.

Күйөөсү аны сабап жатканын бир-эки жолу көргөм. Күйөөсүнүн ата-энеси жакшы адамдар. Кошунамдын үч баласы жаш калышты. Денесин күйгүзгөн деп да жатышат. Бирок эмне болуп каза болгонун так билбейбиз", - деди кошунасы.

Кечээ, 6-январда аялын өлтүрө сабаганга шектелген жаран камакка алынганы маалым болгон.