Дональд Трамптын буйругу менен өлтүрүлгөн генерал Сулейманини акыркы сапарга узатууда 35 адам каза болду

3-январда Иранда экинчи таасирдүү адам болгон генерал Касем Сулеймани АКШнын президенти Дональд Трамптын буйругу менен өлтүрүлгөн. Маркум генералды акыркы сапарга узатуу зыйнатына миллиондон ашуун адам келип, тыгын жаралды. Мындан улам 35 адам каза болгонун, дагы 190 адам денесинен ар кандай жаракаттарды алып жакынкы ооруканаларга жеткирилгенин чет элдик басылмалар жазып чыгышты.

Дүйнөлүк басылмалардын маалыматына ылайык, коштошуу зыйнаты бүгүн, 7-январда Касем Сулейманинин туулуп, өскөн жери Керман жана башка бир нече шаарларда өттү. Ага миллиондон ашуун адам келип, көчөлөрдө адамдардын тыгыны пайда болгон.

"Акыркы сапарга узатуу иш-чарасына келгендердин айрымдары массалык түрдө чогулган элдин тыгынында каза болду. Жабырлануучулар медициналык борборлого жеткирилди", - деп билдирген шаардык "Тез жардам" кызматынын жетекчиси.

Акыркы сапарга узатуу зыйнатын уюштуруп жаткан комитеттин өкүлү элдин көптүгүнөн улам маркумду жерге берүүгө үлгүрбөй калышы мүмкүн экенин билдирди. Ал эми ирандык басылмалар Сулейманинин сөөгүн жерге берүүнүн жаңы убактысы жакынкы аралыкта айтыларын жазып чыгышты.

Ирандын айрым шаарларында генералдын өлүмүнө байланыштуу массалык акция өтүп жатат. Акциянын катышуучулары Сулейманинин сүрөттөрүн көтөрүп алышкан.