Генерал Касем Сулейманинин кызы: "АКШны алдыда чоң апаат күтүп турат"

АКШнын президенти Дональд Трамптын буйругу менен өлтүрүлгөн Иран өлкөсүнүн экинчи таасирдүү адамы болгон генерал Касем Сулейманинин кызынын айтымында, Американы алдыда чоң апаат күндөр күтүп турат. Бул тууралуу ал Тегеран шаарында атасы Сулейманини акыркы сапарга узатуу зыйнатында сөз сүйлөп жатып айтканын чет элдик басылмалар жазууда. Анда ал АКШ жана Израилде жакында кара булут каптаган күндөр боло турганын билдирген.

“Акылсыз Трамп, менин атамды азаптап өлтүрткөнүңдөн кийин баары бүттү, калганы калыбына келет деп ойлосоң жаңылышасың! Алдыда силерди чоң азап, “кара күндөр” күтүп турат”, - деп билдирген ал.

3-январда Иранда экинчи таасирдүү адам болгон генерал Касем Сулеймани АКШнын президенти Дональд Трамптын буйругу менен өлтүрүлгөн.

Кийинчерэк Дональд Трамп генерал Касем Сулейманини согушту баштоо үчүн эмес, токтотуу үчүн өлтүрткөнүн айтып чыккан.