"Кыргыз мамлекети - Австралия беттешинде балдар мамыга чыгып, ток уруп, жаракат алышкан". Белгилүү европалык сайт кыргыз футболу тууралуу жазып чыкты

Белгилүү европалык сайтка кыргыз футболу, футболчулары тууралуу маалымат чыкты. Анда футбол күйөрманы, блогер Тимофей Загорский Кыргыз өлкөсүнө болгон сапары тууралуу жазган. Макалада Тимофей эки жыл мурун Кыргыз өлкөсүнө келгенин айтып, элдин жарды жашаарына, көк бөрү оюнуна укмуш кызыгарына токтолгон. Блогер кыргыз футболун да айланып өткөн эмес. Ал көп жылдан бери Кыргыз өлкөсүндө спорт фотобаянчысы болуп иштеген Наталья Угрюмова менен болгон маегин жарыялаган. Анда Угрюмова кызыктуу окуя катары Кыргыз өлкөсүнүн Австралия менен болгон беттешин атаган.

"Австралия менен беттеш кыргыз футболунда эң көп күйөрман топтогон оюн болду. Элдин баары оюнду көрүүгө ашыгып, билети барлары деле, жоктору деле стадионго агылып жатышты. Оюнду көрөм деп мамыга чыгып алган балдарды ток уруп, кулап, көп жаракат алышты. Бул жапайычылык, көпчүлүк билет алгандар "жакшы отуруп футбол көрөйүн дегем, келсем ордумду ээлеп алышыптыр" деп арызданышты. Айрымдары билети болсо деле экинчи таймда араң стадионго киришти. Анткени биринчи таймда киши абдан көп болгондуктан, тыгын укмуш болду. Стадион негизи 18 200 кишиге ылайыкташкан, анда 25 миңге жакын көрүүчү келген", - деп маек берген Угрюмова.