Бишкектин Ак-Босого жаңы конушунда "эне-баланы өлтүргөн” деп шектелген 28 жаштагы жаран колго түштү

Бишкектин Ак-Босого жаңы конушунда 15-августта “бир аялды жана анын 5 жашар баласын өлтүргөн” деп шектелип, ысык-көлдүк 28 жаштагы А.М. аттуу жаран кармалды. Бишкек ШИИББинин басма сөз кызматы кылмышка шектүү жаран маркумдардын тууганы экенин кабарлайт. Өлтүрүлгөн айым 1968-жылы туулган А.Инин топтоп жүргөн акчасы бар экенин угуп калган шектүү, 13-августта анын үйүнө келип жаткан. Саат 23:00 чамасында аялды муунтуп, акча кайсы жерде экендигин сураган. Акча тууралуу маалымат алган соң аялга кошуп 5 жашар баласын өлтүрүп, 125 миң сомду алып кеткен. Кылмышка шектүү 14-15-август күндөрү интернет клубдардын биринде ойноп, тоноп алган акчасын уттурган. Учурда ал убактылуу кармоочу жайга камалып, тергөө жүрүүдө.