Күбөлөр келбегендигине байланыштуу Өмүрбек Текебаевге козголгон кылмыш ишти кайра кароо боюнча отурум жылдырылды

Бүгүн, 9-январда Бишкек шаарынын Биринчи Май райондук сотунда "коррупция" беренеси менен айыпталган Өмүрбек Текебаевдин жана мурдагы элчи Дүйшөнкул Чотоновдун жазык ишин кайра кароо боюнча соттук отурум уланды. Маалыматты Биринчи Май райондук сотунан билдиришти.

Ага ылайык, бүгүнкү соттук отурумда жактоочулар тарабынан келтирилген "Нур Телеком" компаниясынын кызматкерин адис катары суракка алуу жөнүндө өтүнүчү канааттандырылды. Тизме боюнча биринчи күбө суралды.

"Башка күбөлөр келбей калгандыгына байланыштуу соттук отурум ушул жылдын 23-январына, саат 14:00гө жылдырылды", - деп жазылат маалыматта.

Окуянын чоо-жайы: Өткөн жылдын 21-август күнү Жогорку Сотто Текебаев менен Чотоновго карата чыккан соттук чечимдер жокко чыгарылып, жазык иш жаңы соттук териштирүү үчүн Биринчи Май райондук сотуна жиберилсин деген чечим чыгарылган.

Андан көп өтпөй эле 29-августта Биринчи Май райондук сотунун чечими менен Текебаев менен Чотонов үй камагына чыгышкан.

Жаза мөөнөтүн өтөп жаткан учурда Текебаевдин ишин кайра кароо таржымалы боюнча бардык кабарларды окуу үчүн ушул шилтемени басып өтүңүз.