ИИМ: "2019-жылы 5 миңден ашуун үй-бүлөлүк зордук-зомбулук фактылары катталган"

Үй-бүлөлүк жана гендердик зордук-зомбулукка каршы күрөшүү ички иштер органдарынын негизги багыттагы ишмердүүлүгү болуп саналат. Бул тууралуу бүгүн, 9-январда Ички иштер министрлигинин басма сөз кызматынан билдиришти.

"Аялдарга карата болгон үй-бүлөлүк зордук-зомбулук азыркы учурда актуалдуу маселе болуп эсептелинет. Бул багытта ишти алып баруу учурунда кыйынчылыктар жок деп айтууга болбойт. Себеби бардык эле жабырлануучу расмий арыз менен кайрыла бербейт. Мындай учурларда жабырлануучу тарап арызы менен кайрылбаганы жана күбөлөр дагы мындай фактыны ачыкка чыгарбагандыгы тынчсыздандырат. Эгер мурда үй-бүлөлүк зордук-зомбулукка карата административдик жаза каралса, 2019-жылдын 1-январынан баштап киргизилген жаңы кодекстердин негизинде кылмыш жоопкерчилиги каралган жана Жоруктар кодексине киргизилген.

2019-жылы 5 миңден ашуун үй-бүлөлүк зордук-зомбулук фактылары катталган. Анын ичинде физикалык, психологиялык жана сексуалдык зомбулуктар бар. Ички иштер органдары тарабынан айтылган убакыт ичинде 5 000ден ашуун коргоо ордери берилген. Катталган 580 үй-бүлөлүк зордук-зомбулук фактысы боюнча сотко чейинки өндүрүш жүргүзүлүүдө", - деп жазылат маалыматта.