Ички иштер министринин орун басары Баткен облусуна барды. Жашоочулар мектеп имаратына көчүрүлдү

Ички иштер министринин орун басары Алмаз Орозалиев Баткен облусундагы коомдук тартипти сактоо жана абалды турукташтыруу үчүн Баткен облусуна барды. Бул тууралуу ИИМдин басма сөз кызматынан билдиришти.

Маалыматка ылайык, окуя 9-январдан 10-январга караган түнү саат 00:40 чамасында болгон. Анда Баткен районунун Орто-Боз айылынын Жака-Өрүк участкасы аркылуу өткөн Ош-Баткен-Исфана унаа жолунда Кара-Бак айылынын тургуну М.С.га таандык болгон Хонда Одиссей үлгүсүндөгү унааны Тажик жарандары таш ыргытып, терезелерин талкалап салышкан.

Ошол эле күнү саат 01:10 чамасында Ош-Баткен-Исфана унаа жолунда Баткен районунун Достук айылынын тургуну 25 жаштагы М.Ш.га таандык болгон Фольсваген Гольф-4 үлгүсүндөгү унаасына Тажик жарандары таш ыргытышып, унаанын терезелерин талкалашкан.

Аталган маалыматтар Баткен РИИБинде Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Учурда тергөө жүрүүдө.

Андан сырткары, саат 02:40 чамасында Баткен районунун Көк-Таш айылынын Дахма участкасында Тажикстан тараптан белгисиз ок атуучу куралдан ок атылган. Азыркы учурда ок атуучу куралдан жаракат алып, кайрылган жарандар жок.

"Түнү менен милиция кызматкерлери тарабынан Баткен районунун Көк-Таш айылынын тургундарынын коопсуздугу эске алынып, ошол эле айылда жайгашкан орто мектептин имаратына убактылуу көчүрүлдү. Милиция кызматкерлери күчөтүлгөн режимде чек ара кызматы менен бирдикте коомдук тартипти көзөмөлгө алышууда", - деп билдирет басма сөз кызматынан.

Окуянын чоо-жайы:

9-январдан 10-январга караган түнү саат 00:40та Баткен районунун Жака-Өрүк жергесинде, белгисиз адамдар Баткен шаарына бара жаткан Кыргыз жаранына таандык унааны таш менен урушкан. Унаанын ичиндеги Кыргыз жарандарынын арасынан жаракат алгандар бар экендиги маалымдалган.

Болжол менен бир сааттан кийин, тагыраагы, саат 01:40 чамасында Баткенден Көк-Ташка кетип бара жаткан дагы бир Кыргыз жаранынын унаасын тажиктер Көчө-Карын жергесинде таш менен урушкан.

Саат 02:40та Дахма жергесинде Тажикстандын жарандары Кыргыз жаранынын үйүнө таштарды ыргыткан. Жабырлануучунун үйүнө укук коргоо органдарынын өкүлдөрү менен бирге бараткан чек арачылар Тажикстан тараптан майда калибрлүү мергенчилик куралдан чыккан окко учурашкан. Ок атуулар тажик тараптан гана чыгып жатканын Мамлекеттик чек ара кызматынан билдирген.