Президент Сооронбай Жээнбеков Тажикстандын президенти Эмомали Рахмон менен телефон аркылуу сүйлөштү

Президент Сооронбай Жээнбеков Тажикстан президенти Эмомали Рахмон менен чек арадагы абалды талкуулады. Бул тууралуу президенттик аппараттын басма сөз кызматынан билдиришти.

Өлкө башчы Сооронбай Жээнбеков бүгүн, 11-январда Тажикстандын президенти Эмомали Рахмон менен телефон аркылуу сүйлөштү. Мамлекет башчылары Кыргыз-Тажик чек арасындагы абалды талкуулашты. Сооронбай Жээнбеков эки өлкөнүн чек арасында туруктуу абалды сактоо зарылдыгын өзгөчө белгилеп, жарандардын күнүмдүк тиричилик чыр-чатактары өтө сезгич болуп калганын кошумчалады.

"Кыргыздар менен тажиктердин ортосундагы көп кылымдан берки достугу болуп келген, бар жана да боло бермекчи. Биз чек арадагы абалдын курчуп кетишине жол бербешибиз керек. Тилекке каршы, акыркы убакта чек ара аймагында чыр-чатактар көп болуп жатат. Кечээ эле Кыргыз-Тажик чек арасында кезектеги чыр-чатак болду", - деп баса белгилеген Сооронбай Жээнбеков.

Ошондой эле президент мындай окуялардын алдын алуу үчүн жергиликтүү калктын арасында түшүндүрүү иштерин жүргүзүү маанилүү экенин белгиледи. Телефондук сүйлөшүүнүн жүрүшүндө мамлекет башчылары эки тараптуу кызматташуунун актуалдуу маселелерин жана жакынкы келечекке карай артыкчылыктуу пландарды талкуулашты.