"Качанкыга чейин Куралдуу күчтөр келсин деп күтүп жашайбыз?". Баткендик тургундар Коргоо министрлигинин штабын түштүккө көчүрүүнү суранды

Бүгүн, 13-январда Баткен районунун Көк-Таш айылынын тургундары Бишкекте журналисттерге маалымат жыйын өткөрүштү. Алар бул маалымат жыйынды өздөрү демилге көтөрүп, өткөрүп жатышкандыктарын айтып, андагы абалды бийлик кечиктирбей чечип берсе деген өтүнүчүн айтышты.

Көк-Таш айылынын тургуну Жоробай Байзаков Кыргыз-Тажик чек арасында улам-улам абал курчуп жаткандыгына байланыштуу Кыргыз өлкөсүнүн Куралдуу күчтөрүн жана Өзгөчө кырдаалдар министрлигин Баткен облусуна көчүрүү керек деген өтүнүчтөрү бар экендигине токтолду.

"Мүмкүн болсо, Ош же Баткен облусуна Коргоо министрлиги менен ӨКМны көчүрүп беришсин. Биз ок атуулар башталганда, Куралдуу күчтөр качан келет экен деп качанкыга чейин күтүп жашайбыз? Учурда андагы тургундардын ар бир күнү, сааты коркунуч менен өтүп жатат. Ок атышуу, таш ыргытуу деген кадимки көрүнүшкө айланып бара жатат", - деди ал.