Ысык-Көлдө чарчап калган 11 айлык наристенин чоң апасы арыз жазды

Ысык-Көл облусунун Ак-Суу районундагы ооруканада 11 айлык наристе чарчап калган. Кечээ, 14-январда наристенин чоң апасы арыз менен милицияга кайрылганын облустук милициядан билдиришти.

"10-январда дарыгерлерден бизге маалымат келип түшкөн. Анда 11 айлык наристенин денесинде көк ала тактар бар экени айтылган. Бул факты Кылмыштардын жана жоруктардын бирдиктүү реестрине катталып, наристеге соттук-медициналык экспертизалар дайындалган. Анын жыйынтыгы менен ымыркайдын өлүмүнүн себеби айтылат", - дешти милициядан.

Ошондой эле облустук милиция кечээ наристенин чоң энеси "неберемдин өлүмүн кылдат текшерип бергиле" деп арыз менен кайрылганын, арыз реестрге катталып, териштирүү башталганын кошумчалайт.

Окуянын чоо-жайы:

Наристе 10-январдан 11-январга караган түнү саат 02:20да ооруканага келип түшкөн. Анын башында шишик жана денесинде анча-мынча көк ала тактар болгон. Эртеси Каракол шаарынан башка дарыгерлерди чакыртып, наристеге башка дары-дармектер берилген. Бирок ал түшкү саат 1де чарчап калган. Ал эми наристенин апасы Түркияга иштегени кеткен.