Ош облусунда калкты электрондук түрдө каттоо башталат

Ош облусу боюнча калкты электрондук түрдө каттоо иштери башталат. Бул тууралуу Ош шаардык мэриясынын басма сөз кызматынан билдиришет.

Ош шаарынын мэриясында эл жана турак жай фондун каттоого даярдык көрүүнүн жүрүшү боюнча жыйын болду.

"Кыргыз жергесинде калкты жана турак жай фондун каттоо ушул жылдын 23-мартынан 1-апрелине чейин жүргүзүлөт.

Бул боюнча өкмөттүн атайын токтому кабыл алынган. Эл каттоого даярдыктарды көрүү жана өткөрүү боюнча шаардагы мекеме, ишканалардын жетекчилеринен турган комиссиянын курамы түзүлүп, алдыга бир топ милдеттер коюлду", - деп айтылат маалыматта.

Малым болгондой, эл каттоо 10 жылда бир жолу болуучу республикалык деңгээлдеги иш-чара болуп саналат. Алдыдагы эл каттоо мурда өткөрүлгөн эл каттоодон айырмаланып, электрондук форматта болот. Ар бир үйгө барган каттоочулар тарабынан жашоочулар тууралуу алынган маалыматтар смартфондорго түшүрүлөт.