Депутат Төрөбаев: "Элдин жашоо деңгээлин эшек, ат менен баалабаш керек"

"Элдин жашоо деңгээлин эшек, ат менен баалабаш керек" деп бүгүн, 16-январда Жогорку Кеңештин жыйынында депутат Бакыт Төрөбаев билдирди.

"Кыргыз жаранынын жашоо деңгээлинин жогорулашына шарт түзүп берүү түздөн-түз өкмөттүн милдети. Элдин жашоо деңгээлин эшек, ат менен баалабаш керек. Билим менен баалоо зарыл. Өкмөткө айтат элем көз карашты өзгөртүш керек. Келечекте 4-өндүрүштүк революция келе жатат. Жаңы ойлор, жаңы билим келет. 153 кесип жок болот деп айтып жатышат. Билим берүү тармагын терең изилдөө шарт. Билим берүү системин башкача караш керек. Келечекте кайсы кесип керек болот деп аныктоо зарыл", - дейт Төрөбаев.

Ошону менен катар эле депутат парламенттик шайлоо жакындап келе жатканын айтып, босоголук чек маселесин чечип коюу керектигин билдирди.

Буга чейин биринчи вице-премьер-министр Кубатбек Боронов айылдарда элдин жашоосу жакшырып, 3-4 жылдан бери жолугушууга эшек эмес, ат минип келгендер жок экенин айткан.