Айланма жолдогу транзиттик май куючу жай курчоого алынды. Мамлекеттик чек ара кызматы бул боюнча түшүндүрмө берди

Бишкектеги айланма жолдогу транзиттик май куючу жайды аскер формасын кийгендер зым менен тосуп жатышат деген билдирүүсүн окурман редакциябызга билдирди. Айтымында, казак аскерлери курчалган аймакты күзөтүп турушат. Бул боюнча Мамлекетик чек ара кызматына байланышканыбызда, буларга токтолду.

"Бишкек-Нарын-Торугарт унаа жолунда аралыгы 800 метр болгон транзиттик аймак бар. Ал Казакстанга тиешелүү жер. Транзиттик аймактагы жолду казак тарап зымдар менен убактылуу тосуп койду. Мындан улам Казакстандын аймагында жайгашкан “Азия” жана “Достык” май куючу жайлары бардык жарандар үчүн жабылды. Бирок жол транспорт каттамдары үчүн ачык бойдон калды.

Транзиттик аймактагы жолго кошумча жол белгилери, маалыматтык шиттер орнотулат", - деп билдиришти маалымат кызматынан.

Мамлекеттик чек ара кызматы Кыргыз жарандарын транзиттик жолдогу жол эрежелерин сактоого чакырат.