Чүй ОИИББинин башчысынын дарылануусуна дагы каражат бөлүндү

Чүй облусунун Ички иштер башкы башкармалыгынын башчысы, милициянын полковниги Самат Курманкуловдун абалында жакшы жылыштар байкалууда. Бул тууралуу Саламаттыкты сактоо министрлигинин басма сөз кызматынан билдиришти.

"Самат Курманкулов учурда өз алдынча тамактанып жатат. Буттарынын үстүңкү кыймылдаткыч функциялары калыпка келген. Ошентсе да толук калыбына келүү үчүн болжолдуу түрдө 2020-жылы марттын аягына чейин дарыланат. Өкмөттүн резервдик фондунан анын мындан аркы дарылануусуна 1 миллион 462 миң 69 сом, Саламаттыкты сактоо министрлигинен 4 миллион 798 миң 520 сом бөлүндү", - дейт министрликтен.

Эске салсак, Самат Курманкулов 7-августта Кой-Таштагы атайын операция учурунда оор жаракат алган. Жандандыруу бөлүмүнө түшкөн Курманкуловго Бишкекте эки ирет операция жасалган. Абалы жакшырбагандыктан, 12-августта дарылануусун улантуу үчүн аны Москва шаарындагы ооруканага алып кетишкен.