Японияда алгачкы жолу министр мырза декреттик өргүүгө чыгат

Япониянын Айлана-чөйрөнү коргоо министри Коидзуми Синдзиро баланы кароо үчүн өргүүгө чыккан алгачкы министр болмокчу. Бул тууралуу чет элдик басылмалар жазышууда.

Анын жубайы - белгилүү модель жана телеалпаруучу Такигава Кристель жакында тун баласын жарыкка алып келмекчи. Ошондон улам Япониянын Айлана-чөйрөнү коргоо министри Коидзуми Синдзиро өргүүгө чыгарын айтып кесиптештерин гана эмес, бардык япон элин таң калтырды. Япониянын мыйзамына ылайык, декреттик өргүүгө ата да, эне да чыга алат. Бирок аталар мындай мүмкүнчүлүктү аз колдонушат. Министр өргүүгө 3 айга чыкмакчы. Анын 2 жумасын толук балага каралашканга жумшаса, калган убакта үйдө отуруп мамлекеттик жумуштарын аткара бермекчи. Коидзимунун чечимин Япония министрлер кабинетинин башкы катчысы Есихидэ Суга колдоп, аны үлгү алчу мырза катары баалаган.