Смартфон аркылуу эреже бузган айдоочулар аныктала баштады

"Коопсуз шаар" долбоорунун алкагында Чүй облустук Жол кыймылынын коопсуздугун көзөмөлдөө башкармалыгынын бардык кароол пунктунда планшеттик компьютердик текшерүү орнотулду. Бул тууралуу аталган бөлүмдүн басма сөз кызматынан билдиришти.

"2020-жылдан тартып бардык стационардык кароол пунктунда планшеттик компьютердик механизмдин жардамы менен жасалма мамлекеттик номерлерди, уурдалган унааларды ошондой эле айып төлөбөй жүргөндөрдү, издөөдө жүргөн унааларды аныктоого болот. Мисалы, 5 же андан көп айып пул төлөбөгөн айдоочуга айып пул тууралуу маалымат берилген же берилбегенин планшеттик механизминин жардамы менен билсе болот. Эгер айдоочуга айып пул тууралуу маалымдалган болсо, инспектор унааны 31-берене (эреже бузуу) айып аянтчасына кетирет. Бул долбоор жаңы ишке киргенине байланыштуу инспекторлор учурда айдоочуларга өз убагында айып пул төлөп туруу тууралуу түшүндүрүү иштерин жүргүзүшүүдө", - деп жазылат маалыматта.