"Мүмкүнчүлүк берем!". Зеленский премьер-министрдин отставкага кетүү арызын кабыл алган жок

Украинанын президенти Володимир Зеленский премьер-министр Александр Гончаруктун отставкага кетүү боюнча арызын кабыл албай койду. Чет элдик басылмалардын маалыматына ылайык, Зеленский өкмөт башчы менен жолугушуп ага дагы бир ирет мүмкүнчүлүк берерин айткан.

"Сизге жана сиздин өкмөтүңүзгө коомчулукту кабатыр кылган маселелерди чечип берүү үчүн мүмкүнчүлүк берүүнү чечтим. Өкмөттү күчтөндүрүү үчүн кесипкөй адистерди тартууну тапшырам", - деген Зеленский.

Ошондой эле президент министрлердин бирин дагы тажрыйбасы жок же адилетсиз деп эсептебей турганын кошумчалаган. Айтымында, Алексей Гончарук дагы өкмөттүн күчтөнүшүн каалап жатат.

Гончарук арыз жазганга чейин анын өлкө башчы Володимир Зеленский тууралуу жакшы эмес пикир айтканын далилдеген аудио жазуу тарап кеткен.

Кийинчерээк Гончарук социалдык тармактагы баракчасы аркылуу билдирүү калтырып, кызматка президенттин программасын аткарууга келгенин айткан. Андан кийин кызматтан кетүү тууралуу арызын жазган.

Украинанын Жогорку Радасы өлкөнүн премьер-министрлик кызматына 35 жаштагы Алексей Гончаруктун талапкерлигин өткөн жылдын август айында жактырышкан болчу.