Фейсбук компаниясы туура эмес котормосу үчүн Кытай президентинен кечирим сурады

Кытай Эл Республикасынын президенти Си Цзиньпинден Фейсбук компаниясы кечирим сурады. Аталган компания төраганын атын англис тилине которгондо мазактоо иретиндеги сөз келип чыккан.

Чет элдик басылмалардын маалыматына ылайык, Си Цзиньпин Мьянмага расмий иш сапары менен барып, бир катар келишимдерге кол койгон. Иш сапардын экинчи күнүндө Си Цзиньпиндин ысымы ката экени аныкталган. Тагыраак айтканда, Мянманын тышкы иштер министри, мамлекеттик кеңешчи Аун Сан Су Чжи Фейсбуктагы расмий баракчасына билдирүү калтырган. Анда Кытай президентинин аты "сасык тешик" (Mr. Shithole) деп которулуп калган.

"Биз котормодогу маселелерди жойдук. Мындай ката кайталанбашы үчүн себептерди аныктап жатабыз. Болуп өткөн окуя үчүн чын дилибизден кечирим сурайбыз!" - деп жазылат компаниянын расмий билдирүүсүндө.