"ЭЛДИК КАБАРга" жооп: "Суу тоңуп кооптуулук жаралган жерде жарандык коргонуу кызматы иш алып барууда" дейт министрликтен

Элдик кабар бөлүмүнө окурмандан "Ош облусундагы Чоң-Алай районунун Жекенди айыл өкмөтүнө караштуу Кара-Тейит айылында Ак-Суу дарыясынан суу ашып, айыл жашоочусунун үйүнө кирип кетиптир" деген билдирүү келген.

Бул боюнча Өзгөчө кырдаалдар министрлигине кайрылганыбызда, талап боюнча турак үй сууга жакын салынбашы керек дейт.

"Чоң-Алай районунун Жекенди айыл аймагында Кара-Тейит айылынын Ак-Суу дарыясы тоңуп 2 турак үйгө кооптуулугу жаралган. Учурда жарандык коопсуздук кызматтары жеринде иш алып барууда. Айыл аймактык деңгээлде техникалар тартылды. Белгилеп кетүүчү нерсе, талап боюнча турак үйлөр дарыяга жакын салынбашы керек. Аталган айыл аймагында кооптуулук жаралган үйлөр сууга жакын жайгашыптыр. Бул жашоо үчүн кооптуу экенин эскерте кетели", - дешти маалымат кызматынан.