Сокулукта кичи автобус менен жеңил унаа сүзүшүп, 3 адам каза болду. Дагы 7 адам ооруканада

Чүйдүн Сокулук районунда Mercedes-Benz Sprinter менен Honda Accord унаалары сүзүшүп, 3 адам каза болуп, 7 адам жаракат алды. Бул тууралуу Чүй облустук жол кыймылынын коопсуздугун камсыздоо бөлүмүнөн билдиришти.

Маалыматка ылайык, кырсык бүгүн, 21-январь күнү таңкы саат 06:30 чамасында Бишкек-Ош унаа жолунда болгон.

"Эки унаа карама-каршы тилкеде келе жатып сүзүшкөн. Кырсыктан жеңил унаадагы 3 адам каза болуп, дагы эки жүргүнчү жаракат алышкан. Ал эми Mercedes-Benz Sprinter унаасынан 5 адам жабыркаган. Алар Сокулук райондук ооруканасына жаткырылды. Бул кырсык Кылмыштардын жана жоруктардын бирдиктүү реестрине катталып, учурда териштирүү иштери жүрүп жатат", - дешти басма сөз кызматынан.