Индияда куда менен кудагый чогуу качып кетип, эки жаштын тою токтотулду

Индиянын Гуджарат штатынын Сурат шаарында эки жаштын тою жаңы кудалашчу куда-кудагыйдын качып кеткендигине байланыштуу токтотулду. Бул тууралуу чет элдик басылмалар жазып чыгышты.

Маалыматка ылайык, жигиттин атасы менен кыздын апасы илгери кошуна жашап, бир учурда жолугушуп жүргөн. Экөө жашыруун качып кетүүнү пландап жүргөндө, кызды туугандары бай жигитке турмушка берип коюшат. Ошентип тагдырдын тамашасы менен бир нече жылдан кийин бир кезде сүйүшкөндөрдүн балдары табышып, мамиле куруп калышкан. Февралга пландалган тойго аз калганда, жаңы кудалашмакчы болгон 48 жаштагы жеке ишкер жана 46 жаштагы үй кожойкеси жоголуп кетет. Акыркы жолу 10-январда экөө тең өз үйлөрүндө болгон. Учурда эки тараптын тең туугандары алардын жоголгондугу тууралуу полицияга арыз менен кайрылышкан. Ал эми ыңгайсыз абалда калган жаштар ата-энесинен кабардар болгонго чейин тойду токтотуп турууну чечишкен.