ЖАМК: "Биздин кызматкер Садыр Жапаровду жатак абакка которуу боюнча маалыматты туура эмес берген"

"Абактагы саясатчы Садыр Жапаровду абактан бошотууга эч кандай мыйзамдуу жүйө жок" деп билдирди бүгүнкү маалымат жыйында Өкүм аткаруу жана атайын эсеп башкармалыгынын жетекчиси Бакыт Термичеков.

"Садыр Жапаровду 6-февралда жатак абакка которуу боюнча маалымат чындыкка дал келбейт. Жапаровдун жактоочулары тарабынан интернет тармактарында туура эмес маалыматтар чыгып келет. Биз жазуу түрүндө дагы маалымат бергенбиз. Биз мыйзам чегинде гана иш алып барабыз. Жатак абакка которуу иши Жазаларды аткаруу мамлекеттик кызматынын алдындагы атайын комиссиянын чечими менен ишке ашат.

Жапаровду 6-февралда жатак абакка которуу боюнча маалыматты биздин бир кызматкер туура эмес берип алган. Ал кызматкер Жапаровдун кылмышынын оордугун караган эмес. Анын бул иши иликтенүүдө. Ал кызматкер атайын комиссияда дагы иштебейт. Ал Жазаларды аткаруу мамлекеттик кызматынан башка бөлүмүндө иштейт", - деп билдирди Термичеков.