ЖАМК: "Молдовановкадагы абакта асынып алды делинген 23 жаштагы соттолгон жарандын иши иликтенип жатат"

Чүй облусунун Молдовановка айылындагы №1 түзөтүү абагында жазасын өтөп жаткан 23 жаштагы жаран асынып алганын Жазаларды аткаруу мамлекеттик кызматынан билдиришкен. Ошондой эле алар бул окуяны суицид деп баалап жатканын айтышкан.

Бул окуя боюнча бүгүнкү маалымат жыйында Жазаларды аткаруу мамлекеттик кызматынын орун басары Аскат Эгембердиев бул фактыда киши колдуу болду деген факты жок экенин билдирди.

"Бардык тийиштүү экспертизалар дайындалган. Азыр иликтөө иштери жүрүп жатат. Соттолгон адамдын өлүмүндө киши колдуу болду деген факты жок. Ал асынып, андан соң тамекисинен өрт чыгып, денеси күйгөн", - деди ал.

Буга чейин Молдовановкадагы абакта асынып алды делинген 23 жаштагы соттолгон жарандын окуясындагы жаңы жагдайларды жактоочу айтып берген.