Банкоматтан акча алган аялды аңдып барып тоногон. Шектүү 20 жашта

Банктык эсебинен акча алган аялды артынан аңдып барып, күч колдонуп баштыгын тартып алганга шектелген жаран кармалды. Бул тууралуу Октябрь РИИБинин басма сөз кызматынан билдиришти.

"2019-жылы 20-декабрда Октябрь РИИБисине Т.А. аттуу жаран белгисиз адам саат 15:00 чамасында Тунгуч кичи районундагы көп кабаттуу үйдүн подъездинин жанында күч колдонуп баштыгын тартып алганы тууралуу арыз менен кайрылган. Баштыкта 2 даана Самсунг үлгүсүндөгү уюлдук телефон, капчык (ичинде 15 миң сом бар) жана өздүгүн аныктаган ID-карты болгон. Кылмышка шектүү белгисиз жакка из суутуп кетип, жабырлануучу тарткан жалпы чыгым 30 миң сомго бааланган.

Аталган факты Кылмыштардын жана жоруктардын бирдиктүү реестрине катталып, "уурулук" беренеси менен сотко чейинки өндүрүшкө алынган.

Иликтөөнүн жыйынтыгында уурулукка шектелип, 2000-жылы туулган М.Э. кармалып, убактылуу кармоочу жайга киргизилген. Болжолдуу түрдө ал ГУМдун айланасында жүрүп жабырлануучунун банктык эсептен акча алганын байкап, артынан барып, кол салган. Октябрь райондук соту тарабынан ал үй камагына чыккан. Учурда кылмышка шектүүнүн башка окшош кылмыштарга тийиштиги бар же жогу аныкталууда", - деп жазылат маалыматта.