Сапар Исаков: "ЖЭБ боюнча долбоор ишке ашып жатканда ар бири ага катыштыгын көрсөткүсү келчү"

Бүгүн, 28-январда Бишкек шаардык сотунда ЖЭБ боюнча жактоочулардын аппеляциялык даттануулары каралууда.

Анда мурдагы өкмөт башчы Сапар Исаков сурак берип жатат.

Ал өз сөзүндө, "СМЕС" компаниясынын сунуштаган долбоору кытай компаниясынын ЖЭБ боюнча сунуштаган долбоорунан 38 миллион долларга кымбат болгонун белгилеп өттү. Мындан тышкары, Исаков ЖЭБ боюнча долбоор ишке ашып жатканда көпчүлүк адамдар кызыкдар болуп, ага катыштыгын көрсөткүсү келгендигин айтып, кылмыш иши козголгондо алардын көбү жоопкерчиликтен качып кеткенин кошумчалады.

“Кытай Эл Республикасынын лидери Си Цзиньпин Кыргыз өлкөсүнө болгон сапарынын алкагында бир катар маанилүү жана салмактуу иш-кагаздарга кол коюлган. Алардын арасында ЖЭБди жаңылоо боюнча долбоор дагы бар эле. Биздин мамлекеттин тарыхында биринчи жолу Кытай менен Кыргыз мамлекетинин мамилеси стратегиялык кызматташуу деңгээлине жеткен. Мындай масштабдуу жолугушуунун негизинде бир катар макулдашуулар кабыл алынган. Ошону менен ЖЭБди жаңылоо боюнча иш-чаранын планы түзүлүп, аны өлкө башчы өзү бекиткен. Мындан кийин бардык ведомстволор өздөрүнүн компетенциясынын алкагында иш алып бара баштаган. Бирок макулдашууну ишке ашыруу боюнча негизги жоопкерчилик өлкөнүн тышкы иштер министрлиги менен президенттик аппараттын тышкы иштер боюнча бөлүмүнө жүктөлгөн. Чынын айтсам, ЖЭБ макулдашуусу президенттик аппараттын тышкы иштер боюнча бөлүмүнүн иши эмес болчу дегендерге таң калып жатам. Анда ал иш кимдин компетенциясына кирмек эле?” - деди Исаков.

Исаков ЖЭБ боюнча долбоорду ишке ашыруу кечиктирилсе, долбоордун баасы дагы кымбаттамак дейт. “Бул эл аралык практика” деп кошумчалады ал.