Саламаттыкты сактоо министринин орун басары кызматынан бошотулду. Бул кызматка Төлө Исаков дайындалды

Саламаттыкты сактоо министринин орун басары Эркин Чечейбаев ээлеген кызматынан бошотулду. Бул тууралуу бүгүн, 29-январда өкмөттүн маалымат кызматы тарабынан белгилүү болду.

Чечейбаев Эркин Маратович саламаттыкты сактоо министринин орун басары – Кыргыз Республикасынын мамлекеттик башкы санитардык врачы кызматынан бошотулду. Тиешелүү буйрукка премьер-министр Мухаммедкалый Абылгазиев кол койду.

Бул кызматка Исаков Төлө Байдалиевич дайындалды. Ал 1959-жылы Кемин районунда төрөлгөн. 1987-жылы Кыргыз мамлекеттик медициналык академиясынын "санитардык дарыгер" адистигин, 1998-жылы Кыргыз улуттук университетинин "юрист" адистигин аяктаган.

Эмгек жолун 1978-жылы Кемин районундагы "Кызыл-Суу" совхозунда баштаган.

1987-1998-жылдары - Москва райондук санэпидемстанциянын санитардык бөлүмүнүн башкы дарыгери;

1998-2006-жылдары - Чүй облустук санэпидемстанциянын башкы дарыгери;

2006-2007-жылы - Чүй облусундагы мамлекеттик санитардык-эпидемиологиялык көзөмөл борборунда башкы дарыгер;

2012-жылга чейин - Саламаттыкты сактоо министрлигинин мамлекеттик санитардык-эпидемиологиялык көзөмөл департаментинин башкы директору;

2012-жылдын 3-февралынан тарта - Азык-түлүк, ветеринардык жана фитосанитардык коопсуздук боюнча мамлекеттик инспекциянын жетекчиси - мамлекеттик башкы санитардык врачы;

2013-жылдын 28-мартынан баштап - Саламаттыкты сактоо министрлигинин Оорулардын алын алуу жана экспертиза департаментинин директору.