Ошто "Бандит" аталышындагы рейд учурунда 59 кылмыш ишинин бети ачылды. Уюшкан кылмыштуу топтун мүчөлөрү кармалды

23-январдан 25-январга чейин Ош шаарынын аймагында “Бандит” аталышындагы ыкчам-издөө жана алдын алуу иш-чарасы өттү. ИИМдин маалыматына ылайык, иш-чара уюшкан кылмыштуулук менен күрөшүүнү күчөтүү максатында өткөн.

Ыкчам алдын алуу иш-чарасы “Уюшкан кылмыштуулукка каршы аракеттенүү жөнүндө” Кыргыз Республикасынын Мыйзамына ылайык жүргүзүлдү. Ички иштер органдарынын бирдиктүү мобилдик тобу калк топтолгон жерлерди (мейманкана, түнкү клуб, кафе-бар) текшерүүгө алышты. Натыйжада ИИМдин ыкчам каттоосунда уюшкан кылмыштуу топтун мүчөсү катары турган 31 жаран, анын ичинде “Дженго” каймана аты менен белгилүү К.Д. дагы кармалып, маектешүү үчүн Ош ШИИБине жеткирилди. Кармалгандардын колунун манжаларынын издери алынып, сүрөткө тартып, расмий эскертүү берилди.

Жашаган жерлери боюнча ИИМдин ыкчам каттоосундагы кылмыштуу топтун мүчөсү катары турган 35 жаранга дагы алдын алуу иштери жүргүзүлдү.

Рейд учурунда 59 кылмыш ишинин бети ачылып, "бейбаштык" фактысына шектүү катары уюшкан кылмыштуу топтун мүчөсү катары ыкчам каттоодо турган У.М. кармалды. Андан сырткары, ар кандай кылмыштарды жасагандыгы үчүн издөөдө жүргөн төрт жаран кармалып, дайынсыз жоголгон эки жарандын кайда жүргөндүгү аныкталды.

Автотранспорт каражаттарын текшерүүдө 28 жол кыймылынын эрежесин бузуу, анын ичинде 6 факты транспорт каражаттарын мас абалында башкаруу, унаасынын терезесин мыйзамсыз карангылаткан 22 факты аныкталды.

Учурда ИИМдин Аймактар аралык башкармалыгы уюшкан кылмыштуулукка каршы аракеттенүү боюнча ыкчам-иликтөө жана алдын алуу иштерин улантып жатат.