Жактоочу: "Батукаевдин иши боюнча соттук отурум Раимжановдун ооруканага жатып калышына байланыштуу жылдырылды"

Бүгүн, 30-январда Бишкектеги Биринчи Май райондук сотунда кримтөбөл Азиз Батукаевдин абактан мыйзамсыз бошотулушу боюнча соттук отурум өтмөк. Бирок отурум иште айыпталуучу катары өтүп жаткан Улуттук гематология борборунун мурдагы башчысы Абдухалим Раимжановдун ооруканага жатып калгандыгына байланыштуу жылдырылды. Бул тууралуу SUPER.KG порталына жактоочу Замир Жоошев билдирди.

Буга чейинки өткөн процесстерде Абдухалим Раимжанов өзүн начар сезип жатканын билдирген. Анда ал, учурдагы процесске катышып жаткан үч айыпталуучунун бирөө эле келбей калса отурум токтоп каларын айткан.

Биринчи Май райондук сотунун өндүрүшүндө "коррупция" беренеси менен айыпталып жаткандар мурдагы президент Алмазбек Атамбаев, мурдагы башкы прокурор Индира Жолдубаева, ЖАМКнын төрагасынын мурдагы кеңешчиси Калыбек Качкыналиев жана Улуттук гематология борборунун мурдагы жетекчиси Абдухалим Раимжанов.