Тарбиячылар жумушка чыкпай жаткан №5 бала бакча ачылды

Тарбиячылар жумушка чыкпай жаткан №5 бала бакча ачылды. Бул тууралуу шаардык мэриядан билдиришти.

"Урматтуу ата-энелер! Бүгүнкү күндөн баштап шаардагы №5 бала бакча штаттык режимде иштеп, балдарды кабыл алып жатат. 31-январга карата бакчага 115 бала келгени катталды. Бардык тарбиячылар жана педагогдор иш ордунда. Бакчада комиссия кезметте турат", - деп айтылат маалыматта.

Эске сала кетсек, кечээ 30-январда бакчанын педагогикалык курамы сасык тумоо боюнча карантин деген шылтоо менен иш таштап, балдарды кабыл албай коюшкан. Билим берүү башкармалыгы бакчага барып текшерүү жүргүзгөндө ал жактагы эпидемиологиялык абал туруктуу экенин аныкташкан.

SUPER.KG порталына өздүк булактар билдиргендей, бакчадагы абал карантинге эмес, ата-энелердин бакчанын жетекчисине, бакчанын шартына нааразы болуп мэрияга кайрылганына байланыштуу.

Ал эми мэриядан бакчанын жетекчиси Динара Мазымканова учурда ооруп жатканын, жетекчинин милдетин №131 бакчанын усулчусу Салима Темирова аткарып жатканын кабарлашты.