Улуттук Олимпиадалык комитетинен 2 спортчу айына 1 жарым миң доллардан стипендия алышат

Кыргыз өлкөсүнүн 2 спортчусу Тариэл Жаркымбаев жана Максим Гордеев Улуттук Олимпиадалык комитетинен айына 1 жарым миң доллардан стипендия алышат. Бул тууралуу SUPER.KG порталына Улуттук Олимпиадалык комитетинин коом менен байланыш бөлүмүнүн өкүлү Медер Сталбек билдирди.

"Бул стипендиялар биздин 2 спортчубузга 2019-жылдын ноябрь айынан баштап берилип келет. Стипендия спортчуларыбызга дем берүү жана алардын алдыдагы 2022-жылы өтө турган кышкы олимпиада оюндарына лицензия утууга даярдыктарына жардам катары берилет. Спортчуларыбыз 4 ай сайын бизге келип кандай жерде, кантип даярданып жатышкандыгы тууралуу отчёт берип турушат. Кокус спортчуларыбыз жаракат алып калышса, ушул стипендиянын негизинде дарыланышат", - деп билдирди ал.

Тариэл Жаркымбаев лыжа менен жарышуу түрү боюнча Кыргыз өлкөсүнүн чемпиону. 2017-жылы өткөн Азия оюндарынын жана 2018-жылы өткөн "Пхёнчхан 2018" кышкы олимпиада оюндарынын катышуучусу.

Максим Гордеев тоо лыжа спортунун слалом жана гигант слалом түрү боюнча көптөгөн эл аралык турнирлердин жана 2017-жылы өткөн кышкы Азия оюндарынын катышуучусу.