Суктанууну жаратып, сынга да кабылды. Женнифер Лопес менен Шакиранын чогуу ырдаган видеосу талкуу чордонунда

Голливуд жылдызы Женнифер Лопес менен колумбиялык ырчы, бийчи Шакиранын чогуу ырдаган видеосу талкуу жаратууда. Жылдыздар Майамиде өткөн америкалык футбол боюнча Супер Кубоктун (Super Bowl 2020) финалынын тыныгуу маалында чогуу ырдашкан.

Стадионго алгач Шакира чыгып 2000-жылдан бери популярдуу болгон чыгармаларын аткарган. Андан кийин стадионго Женнифер Лопес чыккан. Концерттик программанын жыйынтыктоочу бөлүгүндө Женнифер Лопестин кызы Эмма ырдап, кийин жылдыздар бийи менен шоуну аяктаган. Видеонун социалдык тармакка жүктөлгөнүнө 2 күн болду. Бул аралыкта видео 57 миллионго жакын кароо топтоду.

Спорт сүйүүчүлөрү ырчылардын сахнага чыкканын анчейин деле жактырышпай, тескерисинче нааразы болушту. Алардын айтымында, ырчылардын ачык кийимдери жана уяттуу жерлерин жашырбай кыймылдаганын камера аябай жакын алып көрсөткөн. "Мындай көрсөтүүнү үй-бүлө мүчөлөрү менен чогуу көрө албайсың", "Бул эки жылдызды аябай жакшы көрөм, бирок бийлегендери бүгүнкү иш-чарага дал келбейт" деген пикирлерин калтырышкан.

Ошентсе дагы 50 жана 43 жаштагы айымдар үчүн мындай шоу көрсөтүү көпчүлүктү таң калтырып, суктанууну жаратты.